【On.cc】BIG FOUR輪流騷肌　蘇永康父子檔打鼓夠驚喜

組合BIG FOUR 4位成員張衞健（Dicky）、許志安（安仔）、蘇永康（康仔）和梁漢文（Edmond）相隔12年再度合體，昨晚（9號）假紅館舉行一連3場演唱會。席間，4子表演難度極高的40指共彈結他，分工合作合奏了梅艷芳的《將冰山劈開》，識彈結他的安仔表示：「希望大家明白，我哋4個男人係好專心做件低能嘢，其實好熱血嘅，唔好意思，彈錯最多係我，不過最好撈喺我隔籬嗰個。」負責將結他當鼓打的Dicky一度無言，但也直認說：「講咩啫？實在係好撈呀。」他又扯康仔落水，指他彈結他似中醫打脈，隨即為自己代言的品牌大賣廣告。

BIG FOUR 4位成員相隔12年再度合體。

氣氛高漲。

Edmond打開上身晒8舊腹肌。

激瘦的安仔全走油膩大叔味。

今次演唱會安仔和Edmond輪流騷肌，Edmond打開上身晒8舊腹肌，演唱會被視安仔翻身之作，激瘦的他全走油膩大叔味，在自彈自唱環節中更剖白心聲，指能和3子開騷很開心，在後台不停拉筋，因為想表演跳唱《翻騰》給觀眾睇，又話幾年的疫情時期中，經常自彈自唱：「輕輕唱同輕輕彈，覺得呢個係人生重要嘅moment，因為唱到自己久違咗嘅聲音， 我好耐冇真心用心唱歌畀大家聽。」嘉賓結他鄧建明上台用結他為《一步一生》合奏，他更一度唱到眼濕濕。安仔落台後，觀眾席發生小插曲，有觀眾發生爭執，有女觀眾在工作人員陪同下離開。

Dicky大唱《西遊記》。

Dicky邀粉絲額頭貼額頭影相。

到Dicky Solo部分時，他化身最潮的「黑超，白毛孫悟空」大唱《西遊記》，更猴子上身原地跳到半空，勾起集體回憶。Dicky表示身上印滿自己歌曲名的白Tee，雖然不是華貴，但記錄了其人生key word，又埋口乖說：「我人生最有意義就擁有你哋 （觀眾），係咪好襟撈呢？」之後邀粉絲面貼面及額頭貼額頭等selfie，由於女粉絲表現熱情，Dicky也笑說：「你個勢好狼。」

演唱會中加插家屬環節，分享各人的愛情故事，被Dicky形容為最值得3子羨慕的康仔出場時，其7歲兒子蘇展弘驚喜現身，為爸爸打鼓伴奏，父子檔齊上陣。最後Edmond、安仔及康仔3子大爆Dicky和太太張茜趣事，指和Dicky去旅行時，張茜呻網絡信號差，Dicky提議太太用酒店Wifi，而搞笑是：「張茜叫老公快啲閂窗，否則Wifi會吹走。」

演唱會中加插家屬環節，分享各人的愛情故事。

康仔的7歲兒子蘇展弘驚喜現身。

父子檔齊上陣。

演唱會近晚上11時完場，但全場大叫encore下，4子再上台，安仔和Dicky共跳探戈，惟Dicky未能跟上節拍，令安仔有點食力，跳完舞後兩人擁抱。演唱會最後一首歌《赤子們》前 Dicky多謝曾合作演唱會的已故夥伴已故錢國偉及太極成員唐奕聰（Gary Tony ），4子主動走到觀眾席握手以表多謝後完場。