明报：罗家英买楼买基金保障阿姐未来 一生功力无人承继留遗憾

罗家英近日接受查小欣YTube频道访问，压轴“感情篇”下集今天（8日）上架。家英哥在节目中透露对身后事已有全盘计划及安排，特别买下一层楼、两份保险留给太太汪明荃（阿姐），甚至购置两幅相连土地，将来与阿姐也百年归老后合葬。

家英哥表示阿姐婚后变成爱做家事的贤内助︰“佢好锺意做屋企嘢，锺意抹枱、执嘢、搬花盆，将啲櫈搬上搬落。佢咪叫工人做，但唔好旨意叫我做。No，我喺屋企係休息嘅，你唔好理我摊喺边度，小小地方我就瞓得㗎啦，所以依家我有间屋做后备，喺广播道，随时嗌交就去住啦！”

谈及与阿姐因何事吵架，他犹有馀怒：“我真係嬲！揸车千祈唔好畀个女人坐你隔篱，叫你行呢度、行嗰度，唔准转弯、唔准咩，几烦，最好（阿姐）眯埋对眼，遮住瞓觉！”

虽然如此，家英哥十分疼惜阿姐。四度患癌的他直言近日已做了很多保障阿姐的未来︰“我最近做咗好多嘢，买咗两份投资保险同基金保险，写咗佢个名，仲有我哋排戏嘅地方，楼上12楼，我都买咗，我话‘有乜嘢事，呢层楼係你嘅’。我话咗俾佢听，佢嘅反应係点呢？冇嘢，全无表示！”

家英哥自言思想传统，来日百年归老，他倾向土葬：“我已经买咗块地，买埋阿姐，买咗两幅，买咗成10几年啦，呢啲好简单，睇你有冇钱去买！”

家英哥与阿姐不忌讳生死话题，平日亦会讨论一下。家英哥说：“我估计都係我走先过佢，佢身体唔错，但我想迟过佢走，我可以照顾佢，等佢放心。我唔会要佢啲钱，讲明㗎啦！ 两公婆绝对要讲钱，唔好唔讲，讲清楚大家冇芥蒂！佢需要我讲清楚，女人对钱好重要，啲钱係佢自己辛辛苦苦挣番嚟，佢唔会乱咁用，亦唔会将钱用喺我身上，最多买件衫我著吓，大家食饭都要AA制。”

谈到两人位于西贡的豪宅属阿姐名下，家英哥被问到可要交租时说︰“差唔多，交半个牀位租。工人要唔要分清楚？唔使。我同佢讲，我同你结婚，你嫁夫随夫，你不如按照我生活去做，我照顾你，啱唔啱？我包晒！不过，依家唔係，係我入赘畀你喎，我去你屋企住，你要你咁嘅生活，要咁嘅包装，我冇能力，亦都话唔想，所以你唔好旨意我负责呢样嘢！我负责啲咩？畀啲家用囉，梗係有五位数，掂唔到六位。佢又OK呀，每个月过数畀佢嘅助手！”

面对未来，家英哥希望能随心所欲、自由自在过日子。他表示︰“好似雀鸟喺天空，呢度飞吓、嗰度飞吓，呢度好食就食、嗰度好住就住，呢个係一个妙想嚟嘅啫，我锺意啲清静无瑕嘅地方，睇吓山、睇吓水，去参透吓生死命题！会唔会想呢个时候弥补遗憾？唔要求，唔好谂咁多嘢，我冇遗憾，我样样嘢都想做，样样嘢都做唔到，不如唔好做，做到就做，做唔到就算数，唔好迫自己。”

家英哥坦言没有下一代，对他来说是一个小小的遗憾。他说︰“不过，有好有唔好，因为冇仔女，你就冇后顾之忧，最多就係我嘅一生功力 - 做大戏冇后人承继。虽然有徒弟，但唔係有血缘！”